Разговор со тетарскиот режисер, Милош Андоновски, натурализиран скопјанец.
„Здраво на сите јас сум скопјанка од крајот на светот, затоа што има многу што сметаат дека Скопје се протега од Аеродром до Карпош 4 и мислат дека се околу е село некое. Инаку јас сум од Влае и Влае не е село.“
„Здраво јас сум Филип и доаѓам од Велес, тоа е еден друг крај на светот за тие што се од Влае. Имам 25 години, студирам 7 години во Скопје, живеам во Скопје, а не сум пропалица, не сум забушант, ова ми е втор факултет затоа што сум паметен и живеам во Скопје во единственото место каде што не живеат Скопјани.“
„Здраво на сите јас сум Ангела и сум скопјанка од Куманово. Јас веќе 12 години живеам во Скопје, поконкретно во Карпош 2. Имам еден пријател кој вели дека кога Кумановци ќе дојдат во Скопје се како кучиња врзани со ланец за Карпош…2. Тоа е затоа што сме сите или талентарани и одиме на ФДУ или паметни и одиме на ФИНКИ.Јас инаку имав еден прекрасен план дека сите изведби на претставата ќе ги искористам за да го решам моето станбено прашање. Мене ми е преку глава од тоа да плаќам кирија. И јас би сакала да најдам сопруг со стан во Карпош 2.“
Ова се дел од воведните реплики на актерите во тетатарската претстава „Скопјани“, во режија на Милош Андоновски.
Токму ова е и главната тема во оваа урнебесно сатирична комедија „Скопјани“ во режија на Милош Андоновски од Куманово.
Како што нагласува тој,оваа претстава е работена по шест раскази од Оливера Ќорвезироска, случајно одбрана заради топлината на расказите, а не по кумановска линија.
Покрај расказите, во оваа претстава се претставени и личните приказни на актерите, на режисерот кој со читателите на 091info.mk сподели дека неговата лична приказна беше најпрвиот импулс да ја направи претставата.
„Од лична причина почна се, затоа што како кумановец кој 12 години живее тука, Куманово одамна не го чувствувам како свое. Сите контакти и сите луѓе ми се во Скопје, а од друга страна Скопје никогаш не може да биде мое, затоа што не е мој роден град и затоа што не може да ме боли за Скопје како што ги боли Скопјани.“- вели Андоновски.
Тој потенцира дека немал никакви отфрлања или дискриминации затоа што не е скопјанец, ама сепак ќе каже: „Од тоа што го имам забележано е дека се потребни неколку години за прв пат некој од Скопје да те покани на гости кај нив“.
„Впечатоците се доста позитивни досега. Публиката ми ја сака претставата, доказ за тоа се полните сали на сите досегашни изведби. Мене лично многу би ми значело доколку стигнеме до десет полни сали односно изведби со полни сали публика, затоа што сепак е независна сцена и маркетингот е мал и незначителен“ – кажува Андоновски
Leave a comment