„Комунална хигиена“ бара инспекциите да казнуваат оти се фрла ѓубре насекаде

Околу 1.600 кубни метри отпад од диви депонии се исчистени во месец јуни, информираат од ЈП „Комунална хигиена“. Од претпријатието велат дека секој ден се соочуваат со мини депонии на јавни површини и затоа бараат надлежните да казнуваат според Законот за јавна чистота.

„И покрај фактот дека основната дејност на претпријатието е собирањето и транспортот на комуналниот отпад од домаќинствата и правните субјекти, екипите секојдневно се максимално ангажирани за извршување вонредни активности како што е расчистувањето диви депонии коишто настануваат како резултат на непрописно одлагање отпад на јавни и сообраќајни површини“, велат од ЈП „Комунална хигиена“.

Од таму апелираат до граѓаните својот отпад да го одлагаат исклучиво во наменски поставените садови – контејнери, канти или корпи за отпадоци.