ПРЕД СТАРТОТ НА МЕМОРИЈАЛНИОТ ТУРНИР ВО МАЛ ФУДБАЛ: Нова тартан подлога на игралиштето Сокол

За една недела почнува деветнаесеттиот Меморијален турнир во мал фудбал „Оливер Соколов – Сокол“, закажан за 1 септември годинава. Како што информира градоначалникот Стевче Јакимовски, за таа цел Државната видеолотарија на Македонија и донираше парични средства на Општината во висина од 2.500.000 денари, со помош на кои, деновиве беше поставена нова тартан подлога на ова спортско игралиште.

Општина Карпош го поддршува традиционалниот турнир со 300.000 денари, а покрај паричните средства, локалната самоуправа изврши корекција на трибинскиот простор и заштитната ограда. Јакимовски изрази голема благодарност до донаторот и упати апел и до другите општествено одговорни компании да го следат примерот на Државната видеолотарија на Македонија.

„Спортскиот дух на Општина Карпош никогаш не недостасувал. За тоа говори и симболиката на ова игралиште, кое го носи името на трагично загинатиот навивач на ФК Вардар. Локалната самоуправа нема да застане тука. Навестуваме дека веројатно ќе се прави и детското и кошаркарското игралиште. Јасно покажуваме дека оваа насока во којашто се движиме со овие донации од општествено одговорните компании, високо е почитувана не само од локалната самоуправа, туку и од граѓаните“, истакна Јакимовски.