Веќе трет ден семафорите на улицата после кружниот тек за накај Визбегово се исклучени. Сигнализацијата е исклучена, полиција не го регулира сообраќајот, па возачите и останатите учесници во сообраќајот се снаоѓаат како знаат и умеат. На овој потег, почнувајќи уште од кружниот тек кој стои со месеци недонаправен, буквално возењето и движењето претставуваат огромна опасност. Кружниот тек стои недовршен, зјаат кабли, подигнати бетонски ѕидчиња. Улицата по која се вози е крпеници. Хаосот станува уште поголем на семафорот кој сега е исклучен, особено што во овој дел има стационирано механизација, багери.
„Не ми е јасно дали некој од Градот излегол да види што се случува. Наместо да се доведува во ред сообраќајниот хаос на овој дел од Скопје, секој ден станува бетер. Треба изгледа да се случи нешто за да надлежните станат свесни за сопствената негрижа кон граѓаните“, вели С.М.
Вообичаено, кога се менува одреден сообраќаен режим, Градот и надлежните се должни да ги информираат граѓаните за воведените промени. Дури и да станува збор за дефект. За исклучувањето на семафорот кај Момин поток никој ништо не информирал.
Leave a comment