Со спуштањето на температурите и со најавата за уште пониски, екипите на Црвениот крст на Град Скопје од пунктот за бездомници во Момин Поток изминативе две недели интензивно излегуваат на терен. Тоа го прават самоиницијативно, но, пред сè, по јавување од граѓани.
Според координаторката на пунктот за бездомници, Драгана Лазаревска, во изминативе две недели имале 10 пријави од граѓани што сретнале бездомници, но вели дека со паѓањето на температурите и со снегот, се очекуваат и повеќе.
„Доколку забележат бездомно лице, граѓаните може да пријават на телефонскиот број 071-223-972. По пријавата, наша екипа од психолог и од социјален работник прави првична проценка на потребите на бездомникот, но и на неговата ранливост. Потоа се утврдува со какви проблеми се соочува и што му е потребно во тој момент. Нашите мобилни екипи секогаш имаат во своето возило вреќи за спиење, ќебиња, сет од капа, шал, ракавици, потоа храна и витамини, па на оние што не сакаат да бидат згрижени во пунктот за бездомници, како и во прифатилиштето, им се остава за да не им биде студено и за да не бидат гладни“, објаснува Лазаревска.
Leave a comment