Рузвелтова во Капиштец изрешетана со дупки, а Град Скопје го прави потегот кај Зоолошка

Улицата Рузвелтова на потегот од улицата Народен фронт до Васил Ѓоргов е изрешетана со дупки. Овој дел на улицата во населбата Капиштец е во очајна состојба, коловозот е полн со огромни дупки и прокопи па граѓаните мораат да возат цик-цак за да ги избегнат дупките.

„Ги искршивме колите од дупки на секој чекор. Сред центар на град, а улицата оставена во ваква состојба“, велат жители на околните згради.

Во ништо подобра состојба не се ниту тротоарите, каде асфалтот е искршен и изваден, па при врнежливо време дупките се полни со вода и кал.

Иако овој дел од улицата е во најлоша состојба, Град Скопје сепак го реновираше другиот потег на Рузвелтова, од улицата Илинденска до булеварот Партизански одреди. Овој потег и пред реновирањето беше во добра состојба односно не беше приоритетен со оглед дека во други делови на градот улиците се во полоша состојба, како и самата улица во делот во населбата Капиштец.