Претседателот Стево Пендаровски денеска со Орден за заслуги за Република Северна Македонија ги одликува Бодан Арсовски, Кокан Димушевски, Влатко Стефановски и Гарабет Тавитјан.
Бодан Арсовски, Кокан Димушевски, Влатко Стефановски и Гарабет Тавитјан се сметаат дека ја сочинуваат најоригиналната постава на легендарните „Леб и сол“, култната македонска група која со своето делување ја испиша современата македонска музичка историја.
„Вашата музика драги лауреати во дамарите на македонската душа и дава митски димензии затоа што претставува културно наследство со кое се идентификуваа, растеа и сѐуште растат, живеат генерации Македонци. Уште од нивниот прв албум објавен далечната 1978 година „Леб и сол“ беа дефинирани како неприкосновени инструментални виртуози и пионери во она што критичрите тогаш го нарекуваа ‘World Music Confussion’. Имено, комбинирајки рок, џез и традиционали македонски ритми притоа создавајки музика која далеку ги надмина границите на времето. Пред речиси половина век „Леб и сол“ се етаблираа во национална гордост и категорија, статус кој без напор го одржуваат низ годините и до ден денес. Во 90-тите членовите на групата започнаа и солистички кариери, соработувајки со исклучителни музичари од целиот свет проширувајки ги музичките хоризонти но останувајки верни на наследството и националниот дух без кој не можете да оставите белези на глобален план. Патувањето на „Леб и сол“ од Скопје до меѓународно призната музичка постава е доказ за моќта на нивното креативно изразување кое далеку ги надмарува признанијата. „Леб и сол“ не само што го збогатија културиот идентитет на македонското општество туку додадоа суштински придонес за развојот на музиката на глобално ниво. Потребен ни е нов албум од вас, во овој формат, размислете“, рече претседателот Стево Пендаровски при доделувањето на ордените.
Членовите на „Леб и сол“ рекоа дека оваа награда е посебно драга, а кога почнале да се занимаваат со музика не ни сонувале дека ќе ја добијат.
„Ние бевме најдобрата група во Југославија“, рече Гарабет Тавитјан откако го доби орденот од Пендаровски.
Leave a comment