АКТУЕЛНО

СПАС ОД ЛЕТНИТЕ ГОРЕШТИНИ: Кровните градини може да ја намалат температурата за 4°C

„Македонија во портокалова фаза, температури над 40 степени“

„Високата температура од 40 степени ги вжешти линиите на итната медицинска помош“

„Скопските улици празни поради високите температури, на Итна помош најмногу повици за проблеми со крвниот притисок“

„Ова лето може да биде неподносливо жешко, но најтешкото допрва доаѓа“

Ова се само дел од насловите кои деновиве ги читаме и слушаме на медиумите. Македонија, како и остатокот од јужна Европа, се зафатени од топлотен бран кој се најавува дека во некои земји ќе достигне дури и до +48 Целзиусови степени. Според прогнозите на домашните синоптичари, температурите во некои делови од државава ќе го надминат 40 степен, а топлотниот бран ќе продолжи и во наредните денови.

Во вакви исклучително жешки моменти, сите го бараме спасот во климатизирани простории, со внесување на што е можно повеќе течности и носење на лесна и светла гардероба. Меѓутоа, во текот на денот имаме неодложни обврски поради кои сме приморани да излеземе на жешкиот асфалт и да се соочиме со екстремно високите температури. За жал, поради масовната урбанизација во градовите, особено во Скопје како главен град на државата, сè повеќе се намалуваат зелените површини. Сенките и парковите сè помалку ги има, на сметка на бетонот и асфалтот кои го голтаат градот, а тоа најмногу го чувствуваме во лето кога дополнително ја зголемуваат температурата и сè потешко се дише.

Според научниците од Универзитетот во Мејн, 4 јули оваа година бил најтоплиот ден на Земјата од почетокот на водењето евиденција од пред повеќе од 40 години. Додека, пак, Европскиот центар за временски прогнози со среден опсег објави дека месецот јуни бил најтопол досега. Емисиите на фосилни горива ја загреваат планетата, а топлото време ги прави топлотните бранови сè поекстремни. Во годините што доаѓаат, научниците сметаат дека топлотните бранови ќе се влошуваат, па така, иако ова лето може да биде неподносливо жешко, веројатно, ќе биде едно од најладните во следните децении. Доколку не се преземе ништо посериозно околу справувањето со глобалното затоплување, температурите на светско ниво ќе продолжат да растат, а тоа во комбинација со масовната урбанизација, не ветува светла иднина за урбаното живеење во големите градови.

Токму затоа, крајно време е да ја сфатиме алармантноста на ситуацијата и да почнеме да преземаме нешто за нејзино ублажување и решавање. А, во дефицит на простор и моментално дадени услови, едно од решенијата е подигнување на кровни градини кои го намалуваат загревањето. Имено, според истражувањата, крововите на кои има поставено кровни градини се со 1-4 Целзиусови степени пониска температура, наспроти конвенционалните кровов.

Дополнително, кровните градини го подобруваат и квалитетот на воздух. Истражувачите проценуваат дека кровна градина со површина од 100 м² може да отстрани околу 40 килограми PM честички од воздухот за една година, а истовремено произведува кислород и го отстранува јаглерод диоксидот (CO2). Покрај тоа, во лето, градините на кровот можат да задржат до 80% од врнежите, а во зима до 40%. По искористувањето, водата се враќа во атмосферата преку транспирација и испарување. И не само тоа, зелените кровни површини, го намалуваат нивото на бука односно служат како звучен изолатор, ја намалуваат потрошувачка на енергија за греење и ладење во домот, а воедно ја зголемуваат и естетската вредност на објектот и даваат пријатен амбиент за оние кои престојуваат во нив.

Leave a comment

Напишете коментар

Вашата адреса за е-пошта нема да биде објавена. Задолжителните полиња се означени со *

Препорачуваме

Related Articles

АКТУЕЛНО

Герасимовски: Парк на Франкофонија добива паметно осветлување

Од Паркот на Франкофонијата започна инсталирањето на Тип 3 светилките кои се...

АКТУЕЛНО

Од денес секој четврток „И јас сум на Водно“

Почнувајќи од овој четврток, од 19 до 23 часот, планинарско-спортскиот клуб „Н2О“...

АКТУЕЛНО

Испратете разгледница со мирис: Франција со поштенски марки кои мирисаат на багети

Франција во полн ек се подготвува за претстојните Олимписки игри, погрижувајќи се...

АКТУЕЛНО

„Девијантно Девојачко“ на Клелија во Бруталиск

Во склоп на Skopje Pride Weekend, Клелија, трансдисциплинарна дизајнерка од Скопје која...