Советниците на Град Скопје на денешната вонредна седница на која се расправаше за актуелната состојба во јавното претпријатие Комунална хигиена и проблемот со собирањето на отпад изминативе денови, донесоа заклучок и ја задолжија градоначалничката Данела Арсовска и директорката на ЈП Комунална хигиена Косана Мазнева-Николиќ да преземат мерки за итно и неодложно делување за надминување на можноста за појава на потенцијална еколошка катастрофа и епидемија на заразни болести. Предлог мерките на советниците се:
- Редовно миење чистење и на сите сообраќајници во градот
- Дезинфекција и дезинсекција на сите места каде што се наоѓаат контејнерите и во блиската околина
- Дезинфекција и дезинсекција и редовно одржување на контејнерите
- Итна набавка на пет нови камиони и механизација за собирање на отпад
- Итна набавка на пет нови модерни еколошки чистачи на улици и сообраќајници
- Детална проверка на договорите за вработување на вработените за кои има сомнеж дека не се појавуваат на работа, а остваруваат право на плата како и на оние со нерегулиран статус повеќе од пет години
- Одговрност за сите кои директно и индиректно учествувале во креирањето на ваквите состојби во ЈП Комунална хигиена
- Проверка на состојбите со договорите на вработените и во останатите јавни претпријатија во соработка со надлежните државни институции
- Ревизија на работата на членовите на Управниот и Надзорниот одбор на ЈП Комунална хигиена
- Формирање на работно тело за надзор на работата на јавните претпријатија
- Редовни и чести координации помеѓу градоначалникот на Град Скопје, Претседателот на Советот и координаторите на советничките групи
- Изработка на функционална анализа на сите установи и институции, како и администрацијата на Градот и истата да се изработи непристрасно, темелно и независно за да може да служи како основа за унапредување на јавните услуги
- Во Кризниот штаб да се вклучат и преставици од Советот на Градот
- Да се достави извештај за работата на ЈП Комунална хигиена до Советот во рок од три дена
- Да се реализира јавна дебата за разгледување на можностите за децентрализација на дел од надлежностите на Комунална хигиена.
Leave a comment