НЕВРЕМЕ ВО СКОПЈЕ: Поплавена Кардиологија, од паднати дрвја оштетени неколку коли

Во силното невреме кое попладнево го зафати Скопје поплавени се подруми на куќи и на Клиниката за кардиологија, искршени се повеќе дрвја и оштетени коли врз кои паднале. Како што соопштува Центарот за управување (ЦУК) со кризи не се пријавени повредени лица.

„На единствениот број за итни ситуации 112 во ЦУК пријавено е дека се поплавени неколку подрумски простории на улица Јордан Мијалков, спроти зградата на „Лимак“, две куќи во населба Драчево, а регистирирано е големо количество вода во подвозникот кај „Тинекс“. Поплавувањето на подвозникот го попречува одвивањето на сообраќајот. Пријавено е дека и на Клиниката за кардиологија се поплавени подрумските простории, каде што се салите за интервенција“, велат од ЦУК.

Низ градот има паднато повеќе гранки од дрвја при првиот налет на локалното невреме во Скопје, а на улица Симеон Кавракиров, во населбата Мичурин во Аеродром паднало големо дрво на улицата што оштетило и возило во движење, а и паркирани возила. Во 18.15 е отстрането од екипи на ЈП „Паркови и зеленило“ на Град Скопје и улицата е проодна.  Истотака имало паднато голема гранка од дрво, во близина на аптека „Зегин“ на булевар „Св. Климент Охридски“

Од Регионалниот ЦУК Скопје стапиле во контакт со пожарникарите од Бригадата (БППЗ) на Град Скопје и биле испратени екипи за испумпување на водата од критичните точки, а и со надлежни за вакви ситуации од претпријатијата на Град Скопје.