Настанот „Митската авантура: Скопските шумски суштества и како да ги пронајдеш“ ќе се реализира денес (недела) со почеток од 11-12:30 часот, со место на случување во Градскиот парк во Скопје. Поради типот на активноста, групата е ограничена на 10 посетители на возраст од 8-14 години. Учеството на ова игрифицирано искуство е бесплатно доколку навреме сте ги пријавиле децата за учество.
Овој настан претставува одлична можност да дознаете повеќе за македонската митологија, традиција и обичаи кои се практикуваат со столетија и тоа преку забавна гамифицирана активност во рамките на „Фестивалот на приказни за деца и млади – Крошна 2“ поддржан од издавачката куќа „Сказнувалка“.
„Митската авантура: Скопските шумски суштества и како да ги пронајдеш“ претставува интерактивна социјална едукативна активност во којашто учесниците ќе имаат можност преку игрифицирано искуство кое во себе ги обединува авантуристичките игри и решавањето мистерии, да дознаат повеќе за традиционалната македонска митологија, обичаи и верувања.
Учесниците добиваат специјална рачно изработена „Митска мапа“ која интерактивно ќе биде проследена со „Магичен прирачник“, неколку сетови на специјално дизајнирани карти, токени, тајни насоки, загатки, кодови и предизвици. Нивна задача ќе биде да ги поврзат сите овие детали како сложувалка, во една логичка целина со цел да откријат како всушност почнува создавањето на волшебните приказни.
Креатор и домаќин на оваа невообичаена авантура ќе биде археологот м-р Василка Димитровска.
Настанот организиран во рамки на проектот „Да ти ја раскажам мојата приказна: протек на европски книжевни дела за млади“ финансиран од програмата „Креативна Европа“ на ЕАЦЕА.
Leave a comment