Градот ќе сади дрвја за 224 илјади евра, од кои едно чини и над 600

Град Скопје ќе купи грмушки и дрвја за 224 илјади евра. Во договорот што градоначалничката, Данела Арсовска го потпишала со фирмата избрана на тендер, никаде не пишува за кои локации и на кои места планира да ги засади дрвјата. Единствено во договорот стои дека за овие пари ќе се купат 66 видови на листопадни и зимзелени дрвја и грмушки, како и обликувани растенија. За одредени видови дрвја Градот ќе плати 37.760 денари по парче, а такви има над десеттина.
Цената од околу 650 евра за парче важи за дрвја како јавор, бреза, индиски јоргован и други.

Минатата година во октомври градот исто купил садници од истата фирма за 211 илјади евра. За само осум месеци разлика во времето помеѓу ланската и овогодинешната набавка на дрвја и грмушки, цените на некој садници дури и тројно се повисоки. Така, за зимзелениот декоративен садник „Taxusrepandenes“ лани градот платил 300 денари по парче, а годинава за истиот плаќа 900 денари.