Првото издание на фестивалот „Стрип трип“ ќе се одржи во МКЦ во Скопје

Младинскиот културен центар го најави првото издание на стрип-фестивалот со наслов „Стрип трип“, што ќе се одржи на 17 и 18 јуни во МКЦ – Скопје.

Од ден во ден организаторите најавуваат сѐ побогата програма, во која ќе бидат вклучени голем број македонски и странски стрип-цртачи и издавачи, а ќе има и дискусии и презентации на најнови домашни и регионални стрип-изданија, изложба на реномирани стрип-цртачи, музичка и филмска програма, работилница за цртање стрип за деца и најважно – берза на стрипови.

Меѓу учесниците на фестивалот веќе се најавени Марко Стојановиќ, Давор Драмиќанин, Михајло Димитриевски – Тхе Мичо, Бошко Караџов, Ѓорѓе Јовановиќ, Александар Стеванов, Никола Темков, Здравко Гиров, Ника Гавровска, Тања Вукобрат, Дарко Богданов, Игор Јовчевски, Владимир Благојевиќ – Владодлак.

Несебична помош и насока во организацијата на фестивалот даваат стрип-книжарницата „Бункер“, издавачот „Стрип Квадрат“ и Тошо Филиповски. Дизајнот на промотивниот материјал за првото издание е на илустраторот и уметник Гоце Илиевски. Фестивалот е финансиски поддржан од Град Скопје.