Советниците не дозволија да се даваат пари за еко-такси возила

По трет пат пропадна предлогот на Град Скопје да дели субвенции за купени нови еко-возила на електричен погон за вршење на авто такси превоз во градот.
Како и претходните, така и овој пат градските советници не го изгласаа овој предлог на градоначалничката, Данела Арсовска со образложение дека „Овие пари ќе бидат залудно потрошени за нешто што нема да даде краен резултат за граѓаните“.
Според предлогот секое правно лице кое е регистрирано за вршење на авто такси превоз на подрачјето на Град Скопје би требало да добие по 200.000 денари по возило, но не повеќе од пет возила по правно лице купени оваа година. Вкупниот буџет за оваа намена кој е предвиден во овогодинешниот буџет на Град Скопје е пет милиони денари.