Пред 15 дена е завршен огласот за враќање на приватните превозници во јавниот превоз, но градоначалничката Данела Арсовска не кажува дали е успешен. Четвртиот по ред оглас беше објавен на 10 април и траеше до 24 истиот месец. Но, од Град Скопје нема никакви информации дали е успешен, потпишани ли се договори или пак е поништен како минатиот пат.
Одговор не добиваме ниту на нашето прашање испратено до Одделението за односи со јавност на Градот и пиар службата на Арсовска.
Огласот беше распишан за линиите со број 9,11,11А,12,19,20,22,23,45,47А,52,54,55,61,63 и 73. За овие линии потребни се 115 автобуси и 245 возачи.
Со доаѓањето на функција на Арсовска јавниот превоз во Скопје е во колапс. Пола година на улиците нема доволно автобуси, граѓаните чекаат со саати, а кога ќе дојде возило не можат да се качат оти е препоплно. На социјалните мрежи кружи видео како луѓе висат од автобус на линијата 9 бидејќи е преполн, па дури не можат да се затворат вратите.
Проблемот настана откако приватниците кои со години се дел од јавниот превоз престанаа да возат оти Арсовска не им плаќаше и долгот стаса до 1,5 милиони евра. ЈСП „Скопје“ нема капацитет да ги надополни линиите на кои возеа приватниците и затоа се создаде хаос.
Арсовска изборите ги доби со ветувањето за брз, ефикасен и бесплатен превоз за сите граѓани, но ништо од тоа не исполни туку напротив го остави Скопје без редовен јавен превоз.
Leave a comment