ПЕТИЦИЈА ПРОТИВ ЗГРАДИТЕ ВО ЛИСИЧЕ: Не сакаме бетонизација, Муцунски да го повлече планот

Жителите на населбата Лисиче поднесоа петиција до градоначалникот на Општина Аеродром Тимчо Муцунски и Советот на Општината против новиот предлог-Детален урбанистички план. Велат дека не сакаат бетонизација и бараат Муцунски веднаш да го повлече ДУП-от, кој како што велат е лош и не е во интерес на граѓаните туку на градежниците.

„За ова кратко време се соочивме со низа препреки и опструкции, но не успеаја да ја скршат нашата комшиска солидарност и сплотеност да ги спречиме во нивните подли намери да ни ја бетонизираат и обезличат населба Лисиче. Но, тука не застануваме будно ќе ги следиме сите нивни чекори“, се вели во петицијата на која се потпишани 711 жители..

Жителите велат дека не биле консултирани и не биле адекватно вклучени во процесот на носење на планот и тој е во спротивност со стандардите и нормативите за урбанистичко планирање. Со градењето на зградите кои ќе бидеат со висина од 16 до 32 метри се загрозуваат условите за хумано живеење, нарушена е животната средина, се загрозува постоечката инфраструктура, правото на сопственост и се обезвреднуваат имотите на граѓаните.

„Во населбата Лисиче нема многу зелени површини. Новиот ДУП кој предвидува згради и сервисни улици токму на зелени површини ќе предизвика дополнително загадување и покрај преземањето мерки против аерозагадувањето“, велат жителите на Лисиче.

Тие петицијата и барањето за повлекување на ДУП-от ќе го достават и до градоначачничката Данела Арсовска, Народниот правобранител, Министерството за транспорт и врски и Министерството за животна средина.

Според предлог ДУП-от во населбата која сега е само со куќи, се предвидуваат девет згради. Четири од нив се на булеварот Србија од кои три се осумкатници со приземје, 6 ката и поткровје, а зградата на ќошот меѓу булевар Србија и улицата 12. Македонска бригада е 12-катница со приземје, 10 ката и поткровје. Пет згради има на улицата 12.Македонска бригада, каде сега се куќи и со новиот план на сопствениците им се дозволува да кренат згради од приземје, 4 ката и поткровје.

Дополнителен проблем е и тоа што зградите се нацртани над главната гасоводна цевка, на која не смее да има никакви објекти.