Еден месец од кога улицата Димо Хаџи Димов беше пуштена за сообраќај се уште не е исцртана хоризонталната сигнализација. Не се обележани ниту колозните ленти ниту пешачките премини. Иако на почетокот на минатиот месец градоначалничката на Скопје, Данела Арсовска најави дека оваа улица е речиси готова и побезбедна, во моментов на терен ситуацијата е поинаква.
Граѓаните велат дека иако улицата е проодна, во фазата во која се наоѓа, не е нималку безбедна како за возачите, така и за пешаците.
На одредени делови од улицата се уште се работи на водоводната мрежа, се поставуваат павер елементи на тротоарите, а само на едно место има знаци кои сигнализираат дека нешто се работи.
„Тука има училишта, градинки и во ваква полунаправена состојба претставува огромна опасност за најмладите. Се снаоѓаме како знаеме и умееме, оти никој не почитува пешаци особено затоа што не се знае каде правилно треба да минуваме“, велат жителите кај Шампионче.
Наместо ветените три месеци, што Арсовска ги даде како рок за завршување на оваа клучна улица во Кисела Вода, од почетокот на реконструкцијата се поминати осум месеци.
За 800 метри улица од Градот се издвоија 41 милион денари.
Leave a comment