Конкурс за најдобри наставници во Центар

Сите наставници и стручни соработници од основните училишта во Општина Центар можат да конкурираат за награди за најдобри наставници од одделенска и од предметна настава и стручни соработници за учебната 2022/2023 година. Документацијата на кандидатите се доставува до Архивата на Општина Центар-Скопје, барака 6 од 2.5.2023 до 10.5.2023 година од 9 до 15 часот.

Право на учество на Конкурсот имаат:

1. Наставници/наставнички од одделенска и предметна настава и стручни соработници што се во редовен работен однос, со минимум три години работно искуство;
2. Предлозите за наставниците и стручните соработници може да ги даде Наставничкиот совет (вкупно тројца кандидати од секое училиште), исто така, на конкурсот може самоиницијативно да се пријават сите што ги исполнуваат предвидените критериуми;
3. При пријавувањето на Конкурсот за кандидатите треба да се достави професионално досие;
4. Право на учество на Конкурсот имаат наставници и стручни соработници што не се наградувани во претходните три години;
5. Изборот на најдобар одделенски, предметен наставник и стручен соработник го врши тричлена комисија формирана од Градоначалникот.

Настанот традиционално се одбележува по повод Денот на словенските просветители Св. Кирил и Методиј, а наставниците се наградуваат со паричен износ и со пофалници, како дополнителен мотив за натамошна креативна работа во воспитно-образовниот процес.