Пешачкиот мост на Бит пазар е затрупан во ѓубре, пластика, стакло и измет. Низ целиот мост се шири неподнослива реа која е потенцијален извор на зарази. Луѓето за да го минат булеварот го користат пешачкиот премин на сообраќајницата бидејќи за мостот никој не се грижи. Поради ужасната состојба во која е оставен од надлежните општински и градски власти, ретко кој се осмелува да го помине.
Пешачкиот мост беше изграден токму заради безбедност на граѓаните. Граѓаните што живеат во овој дел на Скопје се жалат дека понекогаш се случува да не можат да ја преминат улицата поради големиот број возила, двете градски и приградски автобуски станици, како и заради големата раздвиженост на луѓето. Тие велат дека Бит пазар е место каде што во текот на денот поминуваат луѓе од сите делови на градот и каде што автобуските линии се вкрстуваат, па затоа и метежот е преголем.
„Јас, како постар човек поотежнато го поминувам булеварот, што од дивите продавачи, што од импровизираните тезги. А за сообраќајот да не разговараме ,толку е густ што ми треба многу време за да поминам“, вели З.Ј.
Решение за пешачкиот мост нема бидејќи Град Скопје и Општина Чаир постојано си ја префрлаат одговорноста од еден на друг.
Leave a comment