Градските часовници одамна не го покажуваат точното време. Од кога се поставени во 2002 година, па сè досега подолго време не биле во функција, отколку што работеле.
Во моментов во Скопје се поставени 16 градски часовници кои воопшто не работат. Години наназад за нивното одржување Град Скопје избира приватна фирма. Во моментов фирма Градот нема избрано.
Последниот договор со фирма која покрај јавното осветлување треба да ги одржува и градскиte часовници, Град Скопје го склучил пред две години односно на 28 јануари 2021 година. Договорот е со фирмата „Електроизградба“ која за еден милион евра треба да се грижи за уличното осветлување и часовниците низ градот. Оваа фирма треба да ги одржува часовниците и светлото 25 месеци односно договорот истекол на 28 февруари годинава. На страната на Бирото за јавни набавки нов договор за одржување на осветлувањето на улиците и часовниците нема, ниту пак има активен оглас.
Од Град Скопје не добивме одговор на нашите прашања дали има избрано нова фирма за одржување на градските часовници со оглед на тоа дека таков договор нема на страната на Бирото за јавни набавки каде се објавуваат сите договори. Маја Рисова-Мутлулар која е назначена од градоначалничката Данела Арсовска за односи со јавност и комуникација со медиумите, не одговараше на нашите телефонски повици.
Leave a comment