Продолжува санацијата на оштетените плочници кај Градски ѕид. По завршената реконструкција позади Блок 2, во тек е ревитализација на плочникот пред Зелен пазар. Се заменуваат оштетените и искршени терацо плочки на површина од околу 500 метри квадратни кои поради дотраеноста довеле до прокиснување во подземните гаражи. Од тие причини, во овој градежен зафат е предвидено вадење на сите слоеви до армирано бетонската плоча и поставување нова хидроизолација, порамнителен слој и нови гранитни плочки.
„Конечно, по долго време, со оваа санација плочникот ќе прерасне во современ простор, со што ќе се подобри неговата функција и квалитет и ќе претставува одлично место за одмор и рекреација на жителите на Општина Центар“, изјави градоначалникот Горан Герасимовски.
Вкупната вредност на овој зафат е 5.093.470 денари, а санацијата ќе трае до крајот на април 2023 година. Со обновата на плочникот ќе се зголеми и безбедноста на движењето на пешаците околу Зелениот пазар, но и ќе се забрани и поставување на дивите пазарџии кои ги узурпираа јавните површини.
Leave a comment