По повод книга на месец април во Градската библиотека Браќа Миладиновци вечерва ќе се одржи разговор , со авторот на Двојна експозиција, Игор Анѓелков. Почетокот е во 19 часот, во спомен-собата „Т’га за југ“.
Овој разговор е во склоп на кампањата „Читаме заедно“ чија цел е да се популаризираат македонски автори.
„Двојна експозиција“ е збирка од дванаесет раскази поделени по два во шест циклуси: Невиност, Љубов, Бизар, Афион, Статус, Смрт. Во фокусот на секоја од приказните лежи едно централно животно прашање, типично за возраста и биолошко-социолошката фаза на ликовите кои се портретираат.
Разговорот ќе го води книжевната критичарка Александра Јуруковска, а фрагменти од делото ќе чита актерот Андреј Серафимовски.
„Збирката раскази ‘Двојна експозиција’ ќе биде тема и на Клубот на читатели предвиден за 29 април“, информираат од Градската библиотека во Скопје.
Игор Анѓелков е современ македонски автор кој активно се занимава со пишување од 2006 година. Потпишан е на осум прозни дела во издание на Или – Или каде се јавува како ко-сопственик и уредник.
Кампањата „Читаме современи македонски автори“, која Градската библиотека во Скопје ја започна во септември минатата година, по завршувањето на првиот циклус во мај, ќе продолжи во септември со нови осум наслови од исто толку домашни автори.
Leave a comment