Вчера се навршија 122 години од раѓањето на македонскиот експресионистички сликар и еден од втемелувачите на ликовниот живот во Македонија – Лазар Личеноски. Тоа е уметникот кој на своите платна автентично и живо ги сликаше Галичник и Македонија. Неговите слики се сопственост на Националната галерија.
Од февруари 2015 година, куќата на Личеноски, која се наоѓа во подножјето на Скопското кале е државна сопственост.
Основниот проект за санација на куќата и нејзино адаптирање во спомен-куќа „Музеј Лазар Личеноски“ е во надлежност на Конзерваторскиот центар Скопје.Оттаму добивме информација дека куќата на Личеноски е дел од Годишната програма на Заводот.
„Програмата за 2023 година, главно претставува продолжување на отпочнатите активности во текот на 2022 година, а се однесува на увиди на споменици на културата, изработка на Елаборати за валоризација и ревалоризација, изработка и реализација на проекти за ѕидно сликарство, продолжување со реализација на проектите за конзервација и реставрација на фасади, на спомен-домот на Личеноски, како и проектот кој се однесува на Шалтер салата на споменичката целина Нова Пошта, изработка на Заштитно конзерваторски основи за подрачје на опфат на Детални урбанистички планови, како и проект за споменик и спомен обележје од периодот на НОБ“ – изјавија одговорните лица од НУ Конзерваторски завод.
Во 2017 год. спомен куќата на Личеноски е прогласена за културно наследство на Македонија од особено значење. Очекувањата се дека надлежните годинава ќе го исполнат планот и конечно овој објект ќе го добие вистинскиот третман на музеј.
Leave a comment