Денеска Град Скопје објави оглас за доделување линии во јавниот превоз на приватните превозници. Огласот е за истите линии на кои приватниците возеа со години односно додека се скараа со градоначалничката Данела Арсовска. Проблемот настана бидејќи ЈСП „Скопје“ со месеци не им исплаќаше пари, а Арсовска не им го признаваше долгот од 1,5 милиони евра. Поради тоа од декември тие не се дел од јавниот превоз.
Огласот е за 16 линии кои се поделени во три пакети односно за линиите со број 9,11,11А,12,19,20,22,23,45,47А,52,54,55,61,63 и 73. За овие линии потребно е да има 115 автобуси и 245 возачи.
Поднесување на пријавите е до 21 март, а на 27 ќе се врши разгледувањето и одлучувањето. Тоа значи дека приватните автобуси повторно би биле дел од јавниот превоз кон почетокот на април.
Арсовска три месеци не ги примаше на средба приватниците и не признаваше дека има проблем со јавниот превоз, Велеше дека автобуси на улиците има доволно, дека ЈСП „Скопје“ ги заменува овие линии иако граѓаните со саати чекаат на станиците, а кога ќе дојде автобус тој е преполн.
На 1 март превознците имаа средба со претставници на Град Скопје после која изјавија дека бил постигнат договор и покрај нов оглас за истите линии, им било ветено и дека ќе се исплати долгот од 1,5 милиони евра. Тие рекоа дека веќе нема да бидат застапувани преку фирмите „Слобода превоз“ и „Макекспрес“ туку ќе формираат нови три фирми
Leave a comment