Идната недела градските советници ќе одлучуваат дали во јавниот превоз ќе може да се возат и домашни миленици. Оваа иницијатива за слободен пристап на граѓани со миленичиња во градскиот превоз од советниците од Зелен хуман град беше ставена на дневен ред на Советот на Град Скопје пред 10 дена, но за точката ќе се дискутира на седницата на 7. март.
Прифаќањето на оваа советничка иницијатива ќе значи дека секој граѓанин ќе може да се вози во автобус со своето домашно милениче, но истото да биде во посебно изработена заштитна кутија, односно специјален транспортер за животни со што ќе спречат непријатни и несакани ситуации во автобусите, односно несакан контакт на животните со други корисници на јавниот превоз.
„Имајќи го предвид чл. 168 став (2) од Законот за безбедност на сообраќајот на патиштата кој вели дека во патничко возило можат да се превезуваат животни само во посебно изработени заштитни кутии, со оваа иницијатива предлагаме измена на Одлуката за линиски превоз на патници во Град Скопје со која ќе се овозможи граѓаните да имаат слободен пристап во возилата на ЈСП со своите домашни миленици затворени во транспортери како што е уредено со закон“, се вели во иницијативата.
На платформата за директна демократија „МојГрад“, каде беше поставена оваа иницијатива таа била втор најгласан предлог со 1.668 гласови „за“ и 31 глас „против“.
Од домашни миленици, сега право да се возат во автобус имаат само кучиња придружници за лица со попреченост.
Leave a comment